‘पम्फाफूल’ नाटक मानवीयताको आव्हान हो

अन्तर्वार्ता

गृहपृष्ठ
अन्तर्वार्ता
‘पम्फाफूल’ नाटक मानवीयताको आव्हान हो

‘पम्फाफूल’ नाटक मानवीयताको आव्हान हो गोविन्द सुनार, अभिनेता तथा निर्देशक

आइतबार, कात्तिक ३, २०७६ यार्सान्यूज

कलाघर (२०७६) मा स्थापना भएको नाटक घर हो । २०७१ देखि नाट्य क्षेत्रमा क्रियाशील गोविन्द सुनारको अगुवाईमा स्थापित नाट्य संस्था हो । ‘ज्ञ’ थियटरमा सुनिल पोखरेलबाट प्रशिक्षण, ‘शैली ’ थियटरमा ६ महिना अभिनय, ‘मण्डला’मा स्वयमसेवक, ‘पुरानो घर’ मा ६ महिना प्रशिक्षण लिएपछि आत्मविश्वास र नाट्य क्षेत्रको ज्ञानमा निखरतावोधपछि गर्भछिटा, पम्फाफूलमा जोडिएका हुन् गोविन्द सुनार । अन्तर्राष्ट्रिय नाट्य प्रदर्शनीमा निकै चर्चित गर्भछिटामा अभिनेताको भूमिका निर्वाह गरी प्रशंसा बटुलेका सुनारले जुम्ला पम्फाफूल नाटकको मञ्चन गरिरहेका छन् । कार्तिक १ गतेबाट सुरु भएको यो नाटक प्रदर्शनी ८ गतेसम्म जारी रहने छ । जुम्लाको निर्माण व्यवसायी संघको हलमा हरेक दिन साँढे तीन बजेबाट एक शो प्रदर्शनी भइरहेको छ । पम्फाफूलको लेखन, निर्देशन र अभिनयको कार्यमा सरिक गोविन्द सुनारसँग गरिएको छोटो कुराकानीः

सवै तस्वीरः सरोज शाही

पम्फाफूल नाटकको मूल विषयवस्तु के हो ?
धनसम्पत्तिको नाममा मानवीयता विर्सिएका छौँ । दाजुभाई, इष्टमित्र, माया, ममता विर्सिएका छौँ । हाम्रो मेलमिलाप, सद्भाव खलवलिएको छ । त्यो नाटकबाट देखाएका छौँ । पम्फाफूल वास्तवमा राक्षसीपना त्यागेर मानवीयताका लागि सरिक हुन सार्वजनिक आव्हान हो ।

पम्फाफूलको नाट्य परिवेश कस्तो छ ?
नाटकको परिवेश जुम्लाकै छ । नाटकका लागि परम्परागत आँगाको उपयोग गरेका छौँ । पात्रहरु खस भाषामै सम्वाद गर्छन् । कर्णालीको जीवनगाथा नाटकमा आउँछ ।

पम्फाफूलको लेखन, निर्देशनसहित प्रदर्शनीको पक्ष कसरी व्यवस्थापन गर्नुभएको छ ?
यो नाटकको लेखन हिरा विजुली र निर्देशन मैले आफै गरेको हुँ । यो नाट्य संगीत एकाडेमीको नेपाल नाट्य महोत्सवमा प्रदर्शन भएको पनि हो । नाट्य महोत्सवमा प्रदर्शनी हुँदाको वेलाभन्दा नाटकमा थुप्रै सुधारहरु पनि भएका छन् । यो नाटकका लागि जुम्लाका स्थानीय कलाकारहरुलाई एक महिना वर्कशप गरेर, तालिम दिएर प्रदर्शनी योग्य बनाइएको छ ।

जुम्लामा नै किन यो नाटक प्रदर्शन गर्ने सोच्नु भयो ?
कर्णालीमा नाट्यकर्मीहरु छन् । तिनले काठमाडौँ र वाहिरको मञ्चमा राम्रो प्रस्तुती गरेका छन् । काठमाडौँका मञ्चहरुमा नाटकको सन्देश र विषयवस्तुभन्दा परिवेश र कथाको भिन्नतालाई रुचाइन्छ । जुम्लाको परिवेशको नाटक जुम्लामै प्रदर्शन गर्दा यहाँ मानिसहरुले सन्देशलाई बोक्छन् । स्थानीयतालाई नाटकमा छाम्छन् । रुन्छन् । हाँस्छन् र सिक्छन् । यो अवसर जुम्लामा हुनु मेरो लागि धेरै ठूलो कुरो हो ।

पम्फाफूलका दर्शकहरुको कस्तो प्रतिक्रिया पाउनुभएको छ ?
जुम्लामा नाटक हेर्ने कुनै अभ्यास नै छैन । जुम्लाका दर्शकहरुलाई लागि सडक नाटकहरु भएपनि यति व्यस्थित थियटर नाटकको अभ्यास नै छैन । यसले एउटा नयाँ स्वाद र परिवेशमा दर्शकलाई पुर्याएको छ । यो नाटक हेर्न राराबाट फर्किने पर्यटकहरु पनि आइरहेका छन् । नाटकका लागि जुम्लाले न्यानो आत्मियता र आशिर्वाद दिएको छ ।

जुम्लामा कलाघरको भावी योजना के छ ?
जुम्लाको भाषा, साहित्य, संस्कृतिमा ऐतिहासिक भूमिका छ । त्यो भूमिकाको इतिहासलाई कलाघरले प्रवद्र्धन र विकास गर्नेछ । यदि सरकार र स्थानीय निकायले चाहे भने कर्णालीको खस, भाषा, साहित्य, कला र संस्कृतिको प्रवद्र्धनको कार्यलाई पर्यटनसँग पनि जोड्न सकिन्छ । २०२० मा कर्णालीमा आउने हरेक पर्यटकका लागि नाट्य प्रदर्शनी व्यवस्थित गर्न पनि सकिन्छ ।